Plattdeutsche Nachrichten Plattdüütsche Narichten vun'n 27. März 2025

USA verlangt Extra-Toll för Autos – vun den 2. April op an

Brüssel: US-Präsident Donald Trump hett künnig maakt: För Autos, de na de USA inföhrt warrt, wüllt se Extra-Toll nehmen. Vun den 2. April op an sünd dat 25 Perzent. Trump will: Mehr Autos schüllt in de USA boot warrn un bi’n Hannel wüllt se nich mehr so grote rode Tallen schrieven. De Verband vun de Düütsche Autoindustrie meent: De Extra-Toll is en leeg Teken för den freen Hannel. De EU, Kanada, Brasilien, Japan un Süüdkorea hebbt seggt: Se warrt dor en Antwoort op geven.

Mit Anslag drauht: Faeser fohrt nich na Syrien

Berlin: De geschäftsföhren Bunnsbinnenministersch Nancy Faeser wull vundaag egens na Syrien flegen. Man dat hett se nu afseggt. Dat Ministerium hett to weten kregen: Dat kunn en Anslag geven. Faeser wull vunmorgen vun Jordanien na Damaskus flegen, tohoop mit Gerhard Kramer, ehren Kolleeg ut Öösterriek.

Bunnsverwaltensgericht verhannelt över LNG-Terminal in Staad

Leipzig: Dat Bunnsverwaltensgericht verhannelt glieks över dat Nattgas-Terminal in Staad. Dat se de Anlaag an de Elv boen dröfft, dorgegen harr de Umweltverband BUND Neddersassen klaagt. De meent, dat is nich övereens mit dat, wo se natschonaal un internatschonaal op daal wüllt. Ok bruukt se keen LNG-Terminal bavento, wo doch de Anlagen in Willemshaven un Mukran op Rügen gor nich utlast sünd. De Parteien in den Landdag vun Neddersassen meent: Dat Terminal in Staad bruukt se liekers, wenn se dorför sorgen wüllt, dat jümmers noog Gas dor is.

Bremen richt internatschonaal Hannelsgericht in

Bremen: Dat Land Bremen stellt en internatschonaal Hannelsgericht för Seehannel, Luftfohrt, Weltruum un Logistik an’t Hanseatsche Oberlannsgericht op de Been. Dat hett dat Justizressort vermellt. In Düütschland is dat dat eerste Gericht vun düsse Oort. Tokamen Week wüllt se dor de Arbeit opnehmen. Bremen meent, so kunn dat mehr Sekerheit in Rechtsfragen geven för Unnernehmen, de överall op de Welt unnerwegens sünd. Dat Justizressort seggt: Dat passt allerbest to Bremen mit sien Traditschoon as Hansestadt un dat, wat hier in de Wirtschap bavenan steiht.

Fishtown Pinguins speelt wieder mit

Bremerhaven: De Fishtown Pinguins speelt wieder mit, wenn dat dorum geiht, unner de letzten Veer in de Ieshockey-Liga to kamen. Güstern Avend hebbt se de Kölner Haie mit 4:3 na Huus schickt. Wieder is de, de veermal wunnen hett. De Pinguins liggt nu blots noch mit 2:3 torügg. Morgen kunnen se in Köln utglieken. Winnt avers de Haie, denn is Bremerhaven rut.

Dat Weer

Un woans süht dat mit dat Weer umto ut? Opstunns hebbt wi in Bremerhaven un Rotenborg 8 Graad, in Bremen un Cloppenborg sünd dat 9 Graad. Vundaag: Bet Middag hett sik överall de Daak oplööst, un denn lacht us de Sunn bi blots en poor dünne oder lockere Wulken. Dat blifft dröög. Dat Thermometer krabbelt op 11 bet 15 Graad. De Wind dorto weiht flau oder en beten mehr mit frische Böen vun de süüdwesten Kant. Tokamen Nacht kriegt wi de Steerns to sehn. Blots af un an treckt dünne Wulken dör, tomehrst an de See. Bi 6 bet 1 Graad. Morgen: De meiste Tiet lachen Sunnschien. Över Dag kaamt aver mehr un mehr dünne Wulken op. An’n Avend treckt vun Westen her mehr Wulken rin. Dat blifft aver dröög bi 12 bet 18 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jem Gabriele Intemann.