Plattdeutsche Nachrichten Plattdüütsche Narichten vun'n 19. März 2025

Reakschonen op Telefonat vun Trumpun Putin to Ukraine

Berlin. Dat Telfonat twüschen US-Präsident Donald Trump un sien russ´sch Amtskolleeg Wladimir Putin hett bi de Bunnsregerung verhollen Reaktschonen utlöst. Bi den Snack gung dat güstern üm en Wapenroh un woans dat mit den Freden in de Ukraine womöglich wiedergeiht. Bunnskanzler Olaf Scholz sprook vun en „wichtigen Schritt“, den aver noch mehr nakamen mööt. Putin harr verklort, Angrepen op Energieanlagen in de Ukraine för dartig Dag ut tosetten.

FDP-Fraktschon wüllt gegen Finanzpaket klagen

Bremen. De Bremer FDP will vör den Staatsgerichtshoff vun Bremen gegen de in den Bunnsdag besloten Reform vun de Schuldenbrems klagen. Dat hett en Spreker op Anfraag vun butenunbinnen vermellt. So wüllt de Freen Demokraten verhinnern, dat Bremen övermorgen to de Grundgesetzännerung in den Bunnsrat tostimmt. Se meent, dat de Besluss nich na Recht un Gesetz vun dat Grundgesetz löppt. Bet op Bremen klagt de FDP ok in Nordrhein-Westfalen, Hessen un Baden-Württembarg.

ISS-Astronauten torüch op de Eer

Miami. De beiden US-Astronauten Sunita Williams un Butch Wilmore sünd torüch op de Eer. Se mussen vörher üm un bi negen Maand op de Internatschoonal Ruumstatschoon ISS blieven, nadat se egentlich vörharrn, dor blots een Week to blieven. Grund dorför weer en technisch Problem. An´n laten Avend vun use Tiet sünd de beiden unversehrt in en Ruumkapsel in´t Water vör Florida lannen.

Neddersassen will mehr Geld för den Küstenschutz in de Hand nehmen

Nörden. Neddersassen will mehr Geld för den Küstenschutz in de Hand nehmen. De Plans dorför will Ümweltminister Christian Meyer in en halven Stünn vörstellen. De verleden Stoormflootsaison is an de Küst vun Neddersassen un op de Eilannen teemlich ruhig verlopen. Se sünd enigermaten dorvun wegkamen. Neddersassen un de Bund hebbt in dat verleden Johr dorför binah 80 Millionen Euro utgeven. Mit dat Geld wurr ünner annern Sand op de Eilannen opschüdden un de Dieken wurren höger makt.

Filmfest Bremen fangt an´n Avend an

Bremen. Mit en Gala fangt vunavend dat Filmfest Bremen an. To´n theinten Mal drapen sick Filmmakers ut mehr as dartig Lännern. All tohoop lopen bit Sünndag mehr as eenhunnert Wettstriet-Bidrääg. Dorünner ok systemkritisch Films ut Israel, China un de Ukraine. To´n Anfang warrt de britisch Regisseur Stephen Frears vunavend bi de Filmfest Gala in dat Theater vun Bremen mit en Pries för sien Gesamtwark uttekend.

Dat Weer

Un nu noch en Blick op dat Weer: In Cuxhaben, Bremen-Mitt un in Bremerhaben dree un in Nordholt sünd dat opstunns twee Graad. Vundag is de Heven ohn Wulken un so lacht de Sünn den ganzen Dag. De Wind weiht en beten vun de süüdoosten Kant. Dat Thermometer wiest negen bit foffthein Graad. In de Nacht funkeln de Sterns ohn Wulken an´n Heven. Eerst to´n Morgen dükern en poor dünne Wulken op. Minus twee bit plus dree Graad stahn denn op dat Thermometer. Morn stellt sick en Wessel tüwschen Sünnschien un lockeren un dünnen Wulken in. Hier un dor könen de Wulken so dicht ween, dat de Sünn nich dörkieken kann. To´n Avend trecken de Wulken över dat Weser-Ems-Landstück af. De Temperaturen liggen bi elven bit 18 Graad. Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Markus Weise.