Plattdeutsche Nachrichten Plattdüütsche Narichten vun'n 18. März 2025

Tarifverhanneln in Apen Deens fehlslaan

Berlin: De Tarifverhanneln vun Bund un Kommunen in den Apen Deenst sünd fehlslaan. Arbeitgever un Gewarkschoppen kunnt ok in de drütte Verhannelnsrunn nix uthanneln. Nu schall dat en Slichtung geven. För de Arbeitnehmersiet schall dat de Ex Bremer Finanzstaatsraat Lühr övernehmen. Wieldess de Slichtung löppt dörv nich streikt warrn.

Extra-Drapen vun Bunnsdag över Kreditpakeet

Berlin: De Bunnsdag snackt opstunns in en Extra-Drepen över dat Kreditpakeet. Dorop weern sik eerst Union, SPD un Grööne eenig worrn. Dat geiht üm Milliarden-Investitschoon in Infrastruktur, Klimaaschuul un Afwehr. Dorto mutt aver dat Grundgesett änner warrn, woto en Tweedrüttel-Mehrheit bruukt warrt, of dat klappt weer opletzt noch nich kloor. Schüllt de Bunnsdag dat Kreditpakeet hüüt besluten, is Freedag de Bunnsraat an´ne Reeg.

Israel grippt wedder Gaza an

Gaza: De israelsche Armee hett verleden Nacht wedder de Hamas angrepen. De Amtsstuuv vun den israelschen Premier Benjamin Netanjahu mellt: Snacken mit de Hamas över freelaten vun de restlichen israelschen Geiseln sünd wedder scheefgahn. De Hamas smitt Israel dorgegen vör, mit de nee´en Attacken, dat Wapenroh-Afkamen to Enn to bringen un dormit dat Leven vun de Geiseln op Speel to setten.

Trump un Putin wüllt telefoneern

Washington: US-Präsident Donald Trump un de russche Staatsbaas Wladimir Putin wüllt hüüt över en mööglich Enn vun den Ukraine-Krieg snacken. De US-Präsident see, veel wichtig Deele vun dat Afkamen sünd al afsnackt. Annere Fraagen weren aver noch nich kloor, to´n Bispeel de Situatschoon vun bestimmten Rebeeten. De Grundlaag för dat Telefonaat is woll en Plaan vun de US-Regeern för en 30 Daag lang duernde Füerpaus.

Fastsitten Astronauten maakt sik op den Weg na de Eer

Washington: Negen Maand hebbt de US-Astronauten Sunita Williams un Barry Wilmore op de ISS fastsitten. Nu sünd se op den Weg toröch na de Eer. Dat wiest Live-Opnahmen vun de US-Ruumfohrtbehöörd NASA. Eegens schüllt de twee Astronauten blots een Week lang op de ISS blieven. Technisch Maleschen mit ehren Ruumschipp hebbt düssen Stopp länger maakt. Hüüt Nacht schüllt se denn wedder op de Eer lannen.

Dat Weer

Un nu kiekt wi op dat Weer: In Rottenburg minus een Graad, in Bremen un Leer null Graad un in Bremerhoben hebbt wi opstunns plus een Graad. Hüüt lacht den ganzen Dag de Sünn, wenn överhaupt seht wi mal en paar dünne Wulken an Heven. Dat Thermometer wiest us söven Graad op de Eilannen un negen bet teihn Graad in´t Binnenland. In de Nacht köönt wi de Steerns funkeln sehn un dat bi null bet minus söss Graad in´t Binnenland un twee bet een Graad an de Küst un op de Eilannen. Middeweken wiest sik de Heven wulkenfree un wedder lacht de Sünn för us bi twolf bet fofteihn Graad in´t Binnenland un an de Küst bi negen bet ölben Graad.

Dat weren de Plattdüütschen Narichten. Tohoopstellt vun Michael Kück. Op platt torechtmaakt un vörleest vun Martina Brünjes.