Plattdeutsche Nachrichten Plattdüütsche Narichten vun'n 21. März 2025

Bunnesrat stimmt över Milliarden-Finanzpaket af

Berlin – De Bunnesrat hollt just nu Raat över dat Ännern vun’t Grundgesett för dat Milliarden-Finanzpaket vun Union un SPD. Darto höört veel Geld för Verdeffenderen un Sekerheit - de Schullenbrems schall dar meist nich gellen. Darto kummt Sünner-Schullen in Höögde vun 500 Milliarden Euro, de de Bund för den Klimaschutz un dat Üm un Bi opnehmen will. Een Fieftel darvun schall an de Länner gahn. De Bunnesdag harr ehrgüstern all „Jo“ darto seggt – vundaag mutt ok de Bunnesraat dat mit een Tweedrüttel-Mehrheit afnicken.

Armee in’n Sudan winnt Präsidentenpalast trüch

Karthum – Na bold twee Johren Krieg hett de Armee in’n Sudan den Präsidentenpalast trüchwunnen. Se harr de Kuntrull över den Palast övernahmen un de Munitschon vun de RFS-Miliz sekerstellt, heet dat. De Armee kuntrulleert darmit bold wedder de hele Hauptstadt, de Krieg mit de Miliz geiht aver wieter. De RFS-Littmaten sünd wieter de Bestimmer in’n Süden vun’t Land. De „Rapid Responce Forces“ harrn den Palast in’n April 2023 innahmen un darmit is de Striet üm de Macht to een echten Krieg worrn.

Gletscher smölt gauer as je vördem

Genf - Op de hele Welt smölt de Gletscher gauer denn je. As de UNESCO vermellt, hebbt se in de verleden dree Johren mehr Ies verloorn as je vördem siet dat meten ward. Siet 1975 sünd 9.000 Gigatonns wegsmölt, seggt de UN-Behöörd. In fief vun de verleden söß Johren is an’n mehrsten wegsmölt un dat ward in Tokunft woll noch gauer gahn. Dat is vör allens een Problem för dat Water to’n Drinken in de Bergrebeten.

Mehr Straaftaten vun rechts in Neddersassen

Hannober – De Tall vun de Straaftaten vun de rechte Siet is in Neddersassen in’t verleden Johr dull na baben kladdert. Dat is bi een Anfraag vun de Grönenfraktschon in’n Landdag rutkamen – de Tallen liggt den NDR vör. Darna sünd 2024 mehr as 3.600 Straaftaten vun rechts faststellt worr – üm un bi 1.300 mehr as in’t Johr darvör. Meist güng dat darbi üm dat Wiesen vun verboden Symbolen.

Erste dütsche Elektro-Katamaran-Fähr ward dööpt

Norddiek – De Reederee Norden-Frisia dööpt an’n Namiddag ehr erstet Seeschipp, dat alleen dör Elektrik bedrieven ward. Dat Schipp kriegt den Naam „Frisia E-Een“. Vun April an ward de nee’e Elektrokatamaran bit to achtmal an’n Dag vun Norddiek na Norderney un wedder trüch fohrn. 150 Fohrgäst hebbt darop Platz.

Dat Weer

Un nu een Blick op dat Weer: op Wangerooge 6, in Bremerhaben un Deefholt 12 un in Bremen sünd dat opstunns 13 Graad. Vundag gifft dat veel Sünn, vun Südwesten her kann aver Saharastuff den Heben een beten dakig maken – bi 17 bit 20 Graad in’t Binnenland un 13 bit 16 Graad an de See. Tokamen Nacht is de Heben faken klaar, de Steerns funkelt un dat blifft dröög. Dat Thermometer sackt op 7 bit 4 Graad. Morrn blifft dat bi veel Sünn un blots een paar Wulken överall dröög. Saharastuff baben in de Luft kann den Sünnschien aver een beten swacker maken. To’n Abend treckt vun Südwesten her mehr Wulken op – bi 16 bit 18 Graad, op de Eilanden bi 13 bit 15 Graad. An’n Sünndag wesselt sik Sünn un Wulken af, meist dröög bi 11 bit 17 Graad. Dat weern de Narichten op Platt. Gabriele Intemann hett se tohoopstellt. Op platt trechtmaakt un vörleest hett se Heidi Jürgens.