Plattdeutsche Nachrichten Plattdüütsche Narichten vun'n 26. März 2025

Bunnsverfatensgericht verkloort Toslag för dat Tosamenhollen vun Oost un West för richtig

Karlsruhe. De Toslag för dat Tosamenhollen vun Oost un West is na Recht un Ordnung. Dat hett dat Bunnsverfatensgericht jüst fastleggt. De vörsitten Richtersche geev to Protokoll, dat de finanziell Bruken na de Wedderverenigung jümmer noch dor weern. Dat Bunnsverfatensgericht hett dormit de Klaag vun söss FDP-Politikern torüchwiest. Se harrn argumentert, dat de Soli gegen de Gliekheitsgrundsatz verstött un dat Geld bavento al lang nich mehr för den Opbo Oost insett warrt. Den Toslag mööt siet 2021 blots noch üm un bi thein Perzent vun de Lüüd, de Stüern betahlen mööt, betahlen.

EU is sick enig över harde Strafen bi legen Verkehrsvergahn

Brüssel. Autofohrers schüllt bi legen Vergahn in Tokkunft EU wiet bestraft weern könen: Bi dat Drapen snackt se över en Fohrverbott in de ganze Europäisch Union. Dorop sünd Vertreder vun dat EU-Parlament un vun de Mackers övereens kamen. Betto könen EU-Länner, de den Föhrerschien nich utstellt hebbt, blots in ehr egen Land dörchsetten, dat man nich mehr fohren draff. Nu schall dat Land, dat den Föhrerschien utstellt hett, de Oplaag kriegen, dat Fohrverbott in de ganzen EU dörchtosetten.

Düütschland-Ticket schall af 2027 dürer weern

Berlin. Dat Düütschland-Ticket schall dat wieder geven. Af 2027 warrt dat aver pö a pö dürer. Dat slagen Verhandlers vun Union un SPD vör. En poor Medien liggt en Poppier vun de Arbeitskoppel dorför vör, de sick in de Koalitschoonsverhannelns üm de Saak kümmern. Över den Vörslag snackt nu de böversten Verhandlers vun de Parteien.

Wetenschop-Senatorsche liggt Plan för 2030 vör

Bremen. De Hoochschoolen vun Bremen schüllt in de tokamen fief Johr noch starker op de Forschensfeller Klima un Transformatschoonstechnologien utricht weern. Dat steiht in den Vörslag vun den Wetenschopsplaan 2030, de butenunbinnen vörliggt. Vör allen de Meersforschen as ok de Forschen för Robotik un Bregenplietschmaschinen in Bremen schüllt utboot weern. In´n Groten un Ganzen schüllt de Hoochschoolen in den natur- un weertschopwetenschaftlich Studienfachen mehr Studenten winnen. Ok schall de Hoochschool Bremerhaben starker mit dat Alfred-Wegener-Institut tosamenarbeiten.

Grootbosteed op de B75 warrt inricht

Demorst. Op de B75 fangt an´n Avend dat Inrichten för dat grode Fohrbahn nee maken an. De Bunnsstraat warrt dorüm in Richt Bremen twüschen de A28 un Bremen-Huchten kumplett dicht makt. Also af klock thein an´n Avend bit morgen fröh Klock söss. In de Nacht vun Dunnersdag op Freedag warrt denn de Fohrbahn in Richt Ollenborg dicht makt. Ümwegen sünd inricht. Wieldes de Forhbahn dicht is, warrt de Middelplanken nee makt. Af Sünnavend kann man denn dree Maand lang, also bit to´n 29. Juni, in jedeen Richt blots op en Spoor fohren. Grund is, dat op de B75 twüschen Demorst – Stickgras un de Lannsgrenz vun Bremen de Forhbahn heel un deel nee makt warrt.

Dat Weer

Un nu noch en Blick op dat Weer: In Hooksiel söss, Bremen-Mitt un in Bremerhaben söven un in Deefholt sünd dat opstunns söss Graad. Vundag sünd vele Wulken an´n Heven un de Sünn seht wie erstmal nich so faken. Hier un dor gifft dat Spütterregen, man an´n Namiddag lacht de Sünn bit to´n Avend vun´n Heven. De Wind weiht in Maten mit frischen bit starken Böen vun de Noordwesten Kant. De Temperaturen liggen bi acht bit twölf Graad. In de Nacht sünd blots en poor Wulken an´n Heven. In´n Verloop dükert Nevel op. Een bit söss Graad stahn denn op dat Thermometer. Morn fangt dat mit Sünnschien an. In´n Süüden un Oosten vun us Hansestadt gifft dat dichte Wulkenfeller. Af den Middag warrt dat hell un kloor. Blots en poor dünne Wulken sünd an´n Heven to sehn. Dat blifft dröög bi elven bit 17 Graad.

Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Markus Weise.