Plattdeutsche Nachrichten Plattdüütsche Narichten vun'n 25. März 2025

Ex-RAF Terroristin Klette steiht vunwegen Roovöverfall vör´t Brett

Celle: An´t Overlannesgericht Celle hett an´t Vomdag de Perzess gegen de womöögliche Ex-RAF-Terroristin Daniela Klette anfungen. Man smitt ehr versökten Moord un Roov vör. Luut Staatsanwaltschaft hebbt Klette un ehre anneren Macker Ernst-Volker Staub un Burkhard Garweg Inkoopsladen un Geldwagens överfallen, üm ehr Leven in den Unnergrund to finanzeren. De 66-jöhrige hett man vör een Johr in Berlin fastsett. Siet de Tied sitt se in Vechta in Unnersökungshaft.

Bundesdag stellt sik nee op

Berlin: Eenen Maand na de Wahl kummt glieks de nee`e Bundesdag to´n eersten Mal tosamen. Oolt-Präsident Gregor Gysi vun de Linkspartei gifft dat Start-Teken för dat Sitten. Dorna willt se de CDU-Afordnete Julia Klöckner to de nee`e Parlamentspräsidentin kören. Achteran warrt ehre Stellvertrederinnen un Stellvertreder fastleggt. Ok de AfD hett eenen Kandidaten för den Vizeposten opstellt. In verleden Tieden harrn de AfD-Kandidaten aver nie noog Stimmen kregen.

Trump-Regerung schickt ut Versehn Plan för Angrepen op Huthis an Journalist

Washington: De US-Regerung is eene grote Panne bi de Sekerheit unnerlopen. Dat Witte Huus hett seggt, datt dat stimmt. Man hett streng geheeme Plaans för Angrepen, op de jemenitische Huthi-Miliz, Midde März ok an eenen Journalisten schickt. Den Chefredakteur vun een US-Blatt hett man woll ut Versehn in eene Chatgrupp daartodoon. To de Grupp höört ok Vizepräsident J.D. Vance un Minister för`t Verdeffenderen Peter Hegseth. De Demokraten verlangt, datt man den Fall ganz genau op den Grund geiht.

Striet üm Karkenasyl in Bremen geiht in de nee`e Runn

Bremen: De Striet üm dat Karkenasyl in de Brem`sche Evangelische Karken geiht wieter. De Böversten vun de Kark seggt, dat se in de Ziongemenden, in de Neestadt, eerstmal keene Minschen mehr in`t Karkenasyl opnehmen willt. Man de tostännige Paster seggt, datt dat düsse Ofspraak nich gifft. So hett he dat to buten un binnen seggt. De Zionkark in de Neestadt harr in de verleden Tied besünners veel Karkenasyl tolaten.

Fischtown Pinguins hebbt de Kurve kregen bi de Playoffs

Bremerhaben: De Fischtown Pinguins hebbt bi de Playoff-Viertelfinal-Serie vun de Düütsche Iishockyliga eerstmal noch de Kurve kregen. De Bremerhabener hebbt an´t Avend in Köln mit 5:2 wunnen. Dat is ehr eerste Sieg in de Viertelfinalserie. In de Gesamtweertung hebbt de Kölner wieter de Näs vörn mit 3 to 1. Se mööt  blots noch een Mal winnen, denn sünd se wieter. Morrn steiht dat tokomen Speel in Bremerhaben an.

Dat Weer

Un nu een Blick op dat Weer: in Bremen, Bremerhaven, Defhold un Nenborg sünd dat opstünns överall 5 Graad. Hütt is dat den ganzen Dag gries un de Sünn kriegt wi blots af un an mal to sehn. An´t Nomdag kummt vun Oostfreesland bit to de Elb Regen op. In Bremen un in`t Süden dorvun fangt dat eerst hütt Avend an to pieseln, bi 9 bit 13 Graad. Tokamen Nacht hört de Regen den op, man de Heven is wieter vull mit Wulken, bi 7 bit 5 Graad. Morrn geiht dat wedder mit vele Wulken los. An´t Nomdag lockert dat op un wi kriegt ok mal de Sünn to sehn. Meist blifft dat dröge, wi mööt blots hier un dor mal mit Schuers reken. De Temperaturen liggt bi 8 bit 13 Graad. Dunnerstag geiht dat mit Nevel un Hoochnevelfeller los. Man denn lacht us ok mal wedder de Sünn an , meist in´t Ollenborger Münsterland. Hier un dor kann dor mal so´n beten Natt vun baven rünnerkamen, bi 10 bit 16 Graad. Dat weren de Narichten op Platt. Tohoopstellt hett se Anja Guse. Trechtmaakt un vörleest vun Antje Kruppa.