Plattdeutsche Nachrichten Plattdüütsche Narichten vun'n 20. März 2025

Dusende protesteren in de Türkei gegen Fastsetten vun Erdogan-Rutfödderer

Istanbul: De Behöörden in de Türkei gaht wieder gegen den Börgermester Ekrem Imamoglu vör. Sien Boünnernehmen wurr beslagnahmt, maakt de Generalstaatsafkaatschop künnig. Imamoglu is güstern fastsett worrn – een paar Daag vör sien plaante Wahl to den Präsidentschopskandidaten vun de gröttste Oppositschoonspartei in de Türkei. An Avend sünd dusende Minschen dorgegen op de Straat gahn.

EU-Top-Drepen snackt doröver wat de US-Politik für Europa nakaamt

Brüssel: De Staats- un Regeernsböversten de EU kaamt Klock olven to en Top-Drepen tohoop. Dat Drepen steiht ünner den Indruck vun de verännert weltpolitschen Laag siet Donald Trump wedder US-Präsident is. Hauptsaak geiht dat dorüm, wo bruukbor de EU in den Wettbewarf is. Wieder snackt de Böversten över de Laag in de Ukraine un wo goot de Afwehr in de EU is. Man ok de Laag in den Negen Oosten un de Migratschoon sünd Deel de Agenda. As Gäst sünd ok
UN-Generalsekretär António Guterres un de ukrainsche Präsident Wolodymyr Selenskyj dorbi.

Stephen Frears kriggt Bremer Filmpries ut de Hand vun Hugh Grant

Bremen: De britsche Regisseur Stephen Frears hett an Avend in dat Theater Bremen den Bremer Filmpries för sien Levenswark kregen. De Loffreed hett unvermodens Schauspeler Hugh Grant holen. Bi de Gala see Grant sien Landsmann is en Genie. Frears sülvst ünnerstrickt de Wichtigkeit vun den europäschen Film – hauptsaak in den Vergliek to den allens vörherrschen US-Markt.

Extremweerutstellung in dat Klimaahuus Bremerhoben

Bremerhoben: In dat Klimaahuus is siet hüüt de nee´e Duer-Utstellung över afsünnerliche Weerbegevenheiten to sehen. Besökers köönt nu op binah 1500 Quadraatmeters un dree Etagen toweten kriegen, wo Floten, Hittwellen or Küselstöörm sik billen un woso se verleden Tieden fakener un stärker wurrn. All tohoop hett de Utstellung 15 Millioon Euro kost.

Veer junge Lüüd sünd achterna en Autounfall swoor versehrt in en Krankenhuus kamen

Bassum: Bi en Autounfall in den Kreis Deefholt sünd veer junge Minschen twuschen 16 un 18 in en Krankenhuus kamen. Dree sünd levensgefährlich un een is swoor versehrt. As de Polizei künnig maakt, keem de Wagen vun en achteihn-Johrigen gegen Klock halv een vun de Fohrbahn af un prallt gegen en Boom, woso is noch nich kloor. De B51 weer bet an morgen dicht.

Dat Weer

Un nu kiekt wi op dat Weer: In Bremen un Rottenborg hebbt wi veer Graad, in Bremerhoben un Emm sünd dat opstunns söss Graad.

Hüüt lacht de Sünn, af un an sliekern mal en poor dünne Wulken vörbi, un köönt sik ok mal vör de Sünn setten, man över Namiddag trecken de denn över dat Werser-Ems-Rebeet af. Liekers blifft dat Dröög bi fofteihn bet negenteihn Graad in´t Binnenland un an de Küst bi olben bet veerteihn Graad. In de Nacht mischen wedder en poor Wulken mit, man de Steerns lücht liekers un dat blifft dröög. An morgen kriegt wi en beten Daak or hogen Daak bi fief Graad op de Eilannen un plus dree bet minus een Graad in´t Binnenland. Freedag fangt eerst daakig an, achterna lacht de Sünn, blots an de Küst blifft dat morgens diesig. Övern Dag kaamt vun süüdwesten her Saharastoff in den hoogen Luftschichten dorto. Dat warrt, so as dat in´t Fröhjohr ween schall, sössteihn bet negenteihn Graad in´t Binnenland un twolf bet fofteihn Graad an de Küst.

Dat weren de Plattdüütschen Narichten. Tohoopstellt vun Gabriele Intemann. Op platt torechtmaakt un vörleest vun Martina Brünjes.