Plattdeutsche Nachrichten Plattdüütsche Narichten vun'n 24. März 2025

Trüchdenken an Afstörten vun Germanwings-Fleger

Le Vernet: Teihn Johr is dat nu her, datt de Germanwings-Fleger mit 150 Minschen an Bord in de franzöös’schen Alpen afstört is. De Verwandten denkt in de Neegde vun düsse Steed in Le Vernet an se trüch. De Co-Pilot, bi den al psych’sche Maleschen bekannt weern, harr den Fleger na Menen vun de Polizei mit Afsicht gegen dat Bargmassiv stüert. Nümms hett överleevt. Ünner de Flooggäst weern 72 Düütsche, ünner annern 16 Schoolkinner un twee Schoolmestersche ut Haltern an’n See in Noordrhein-Westfalen. Dor gifft dat glieks üm 10.41 Uhr en stille Minuut.

Slichten in’n Öffentlichen Deenst fangt an

Berlin: In’n Tarifstriet in’n Öffentlichen Deenst fangt hüüt dat Slichten an. De Slichters sünd de fröhere Bremer Finanzstaatsraat Hans-Henning Lühr un de fröhere hess’sche Ministerpräsident Roland Koch. Se schüllt en Lösung för Inkamen un Arbeitstieden vun 2,5 Millionen Mitarbeiders vun Bund un Gemeenden finnen. Ehr Drapen is vertroolich un findt an en geheem Oort statt. Wieldess gellt de Fredensplicht, dat draff keen Streik geven.

Union un SPD vermellt Twüschenstand bi’t Koalitschoonsverhanneln

Berlin: Union un SPD wüllt hüüt den eersten Stapp bi dat Koalitschoonsverhanneln to Enn bringen. De 16 Verhannlungsteams schüllt bet Klock fief an’n Namiddag vermellen, wo wiet se kamen sünd. Ehr Berichten ward opschreven. Verscheden Menen gifft dat, as dat schient, noch in de Rebeeten Finanzen, Soziaalpolitik un Migratschoon. Wo se sik noch nich enig worrn sünd, wüllt se düsse Week in’n lütteren Kring wietersnacken.

Ümbo vun’n Haben in Cuxhaben fangt an

Cuxhaben: Vun hüüt an ward de Kaimuer in’n oolen Fischereihaben vun Cuxhaben wedder trechtmaakt. Later an’n Dag ward dat den eersten Rammslag an de 1000 Meter langen Kaikant geven. De nee’e Stahlspuntwand ward 22 Meter deep ween. Düsse Arbeit is de Anfang för den groden Ümbo vun’n Haben in en nee‘et Stadtquarteer. Ünner annern ward de Butenanlagen nee maakt, un in de Fischhallen 5 un 6 treckt en Hotel. All tohoop ward dat nee’e Stadtquarteer meist 100 Millionen Euro kosten.

Lüüd ahn Wahnung kriggt ümsünst Brillen

Bremen: Twee gemeennützig Organisatschonen verdeelt an’n Namiddag in Bremen ümsünst Brillen för Lüüd ahn Wahnung. Düsse Minschen köönt twüschen Klock een un dree an’n Namiddag in de Stadtkark „Unser Lieben Frauen“ ehr Sehkraft bestimmen laten. Darna kriggt se direkt en passlich Brill. De kummt denn ut en Bestand vun bruukten Brillen, de oparbeidt worrn sünd.

Dat Weer

Un nu en Blick op dat Weer: In Nordholt 5, in Bremen un Bremerhaben 7, in Leer 9, un in Deefholt sünd dat opstünns 10 Graad. Hüüt is dat faken wulkig. Later an’n Dag kummt besünners an de Küst ok mal de Sünn rut. In’t Binnenland fallt enkelte Schuers. To’n Avend hen kann dat in’t Ollenborger Münsterland ok enkelte Gewidder geven. Dorto gifft dat Temperaturen vun 9 Graad op de Eilannen un 12 bet 16 Graad op’t Fastland. In de Nacht is dat mehr oder weniger wulkig, aver meisttiets dröög. Hier un dor kann dat Daak geven. To’n Morgen hen ward de Wulken vun de Noordsee her dichter. De Luft köhlt sik af op 5 bet 2 Graad. Morgen gifft dat veele Wulken, wenig Sünnschien, un dat kann eerst ok dakig-gries ween. An’n Namiddag un Avend kummt vun de Noordsee her af un an’n beten Regen oder Spütterregen op. In’n Süüden vun Bremen blifft dat dröög. Dat Thermometer stiggt op 9 bet 13 Graad.

Dat weern de Narichten op platt. Tohoopstellt hett se Sven Kuhnen. Op Platt trechtmaakt un vörleest vun Marc Gelhart.