Plattdeutsche Nachrichten Plattdüütsche Narichten vun'n 28. März 2025

De Eer hett bevert: Hotel un Brügg instört

Bangkok: In Myanmar hett de Eer gewaltig bevert. Tominnst eene Brügg un en Rehg Hüüs in dat Land in Süüdoost-Asien sünd dorvun instört. In de Mitt vun’t Land is en Hotel tohoopsackt. Seggt warrt: Vele Minschen köönt dor nich rut. Marken kunn een dat Bevern ok in Thailands Hauptstadt Bangkok un in Parten vun China un Indien. Dat Düütsche Geo-Forschungs-Institut in Potsdam hett vermellt: För dat Bevern hebbt se den Weert 7,6 meten.

Top-Lüüd vun de Parteien övernehmt Verhanneln över Koalitschoon

Berlin: Knapp fief Weken is de Bunnsdagswahl her. Nu steiht bi dat Verhanneln över en Koalitschoon de Törn an, op den dat ankummt. En Koppel mit 19 Politikers rund um de veer Lüüd, de in de Parteien dat Leit hebbt, schüllt sik um de keddeligen Fragen kümmern. Wat se besnackt, schall nich na buten gahn. Mal um mal wüllt se sik in’t Konrad-Adenauer-Huus, in’t Willy-Brandt-Huus un in de bayrische Lannsvertretung drapen.

Putin: UN schall Ukraine verwalten

Murmansk: Russlands Präsident Wladimir Putin hett vörslaan: De Ukraine schall unner dat Leit vun de Vereenten Natschonen kamen. So kunn dor nee wählt warrn, sä he, as he Murmansk besöken dee. Mit de ne’e Regerung kunn Russland denn över en Fredensverdrag verhanneln. En Spreker vun de US-Regerung wull dor nix vun weten. Na de Gesetzen in de Ukraine gifft dat dor kene Wahl, wenn in’t Land Krieg is.

Autowettfohrt in den Bremer Westen

Bremen: In Walle hebbt verleden Nacht mehrere Lüüd woll en Autorennen maakt – gegen Recht un Gesetz. Veel to gau weren se dör de Bremerhavener Straten in den Oortsdeel Westend karjoolt. Een Wagen is över de Autobahn na Bremerhaven to utneiht. De twete is överkopp gahn. Twee Lüüd, de dorbi weren, hett de Polizei faatkregen.

Weltruumfohrt to’n Kennenlehren

Bremen: Vundaag un morgen löppt överall in Düütschland dat eerste Mal de „Dag vun de Weltruumfohrt“. Jan un Allemann köönt sik de Weltruum-Technik vun unnerscheedliche Kanten ankieken. Mit dorbi sünd ok de Hoochschool Bremen, de Ariane-Grupp un dat Schöler-Labor vun dat Düütsche Zentrum för Luft- un Weltruumfohrt.

Dat Weer

Un woans süht dat mit dat Weer umto ut? Opstunns hebbt wi in Weyerbarg 11 Graad, in Bremen, Bremerhaven un Emm sünd dat 12 Graad. Vundaag: Sunnschien satt: bet 11 oder 12 Stunnen lang vun de Lümborger Heid bet hen na’t Wendland. Vun Westen her kaamt mehr un mehr dünne Wulken op. Gegen Avend noch mehr Wulken vun’t Emsland un Oostfreesland. Dat blifft aver meist överall dröög. Dat Thermometer krabbelt op 12 bet 18 Graad. De Wind dorto weiht flau oder en beten mehr vun de süüdwesten Kant, an’n Avend dreiht he op West. Tokamen Nacht: Eerst lockere Wulken, vun Westen her treckt de Heven aver dicht, un in’t Emsland un Oostfreesland kann’t ok mal pieseln. Bi 7 bet 4 Graad. Morgen: De Wulken blievt eerst noch twüschen Werser un Elv. Anners kummt al an’n Vörmiddag de Sunn rut. An’n Namiddag mal Sunnschien, mal Wulken. Dröög bi 9 bet 13 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jem Sven Kuhnen.