Plattdeutsche Nachrichten Plattdüütsche Narichten vun'n 17. März 2025

Trump künnigt Snacken mit Putin an

Washington: US-Präsident Donald Trump hett vunmorgen en Snack mit den russchen Präsident Wladimir Putin ankünnigt. Dorbi schall dat üm en Wapenroh in de Ukraine gahn. De Utsichten dat sik de Twee eenig warrt sünd goot, deelt Trump mit. As een Punkt nöömt he dat Opdeelen bestimmt Vermögen twuschen Russland un de Ukraine.

Tarifverhanneln in Apen Deenst gaht wieder

Potsdam: Dat Drepen vunwegen Tarife för den apen Deenst schüllt hüüt wieder gahn. Över Nacht wurr en Paus maakt. Bi de Beradens liggt nu en neen Vörslag vun de Gewarkschopen op den Disch. De drütte Verhannelsrunn löppt siet Freedag. Dat geiht üm Lohn un Arbeitstieden för um un bi 2,5 Millioon Mitarbeiders.

Fastsitten Astronauten schüllt morgen op de Eer torüch ween

Washington: De op de internatschonaale Ruumstatschoon ISS fastsitten US-Astronauten schüllt al morgen to de Eer torüchkamen, eerst weer Middeweken plaant, hett de Rummfohrtbehöörd NASA künnig maakt. Dor achter stickt good Weer. De twee Weltrummfohrers weren in Juni to de ISS flagen un schüllt eegens acht Daag in dat All blieven. Vunwegen technisch Maleschen kehrt damals dat Ruumschipp aver ahn de Twee na de Eer torüch.

Spoorboarbeiden soorgt för Stah-in´n-Weg in den Bremer Süüden

Bremen: In den Bremer Süüden löppt vun hüüt Avend af an nich allens rund bi Bus un Bahn. Vunwegen Spoorboarbeiden is de Straatenbahnstreck twuschen Huchting un de Neestadt dicht. För enkelt Lienen de BSAG ännert sik de Fohrplaan, to´n Deel föhrt ok Behölpbussen. De Boarbeiden schüllt een Week lang anduern.

Neddersassen beedt kostenlos Kastratschoon vun Straatenkatten an

Hannober: Dat Land Neddersassen betahlt wedder Toschööt för de Kastratschoon vun Straatenkatten. Wer en unkastreerte, freelevend Katt finnt, kann se vun hüüt af an bet Enn April to all Deertendokters, de ehr Praxis in Neddersassen hebbt, bringen. Dorför geevt dat Land 136.000 Euro free, so en Sprekersche vun dat Landweertschopsministerium. Mit düsse Aktschoon schall verhinnert warrn, dat jümmer mehr Straatenkatten in Neddersassen dorto kaamt.

Dat Weer

Un nu kiekt wi op dat Weer: In Bremen, Bremerhoben un Möppen hebbt wi dree Graad un in Emm sünd dat opstunns veer Graad. Hüüt lacht de Sünn, af un an sünd en paar Wulken dorbi, hauptsaak in süüden Bremen. Överall blifft dat dröög bi söss Graad op de Eilannen un söven bet negen Graad in´t Binnenland. In de Nacht köönt wi de Steerns blinkern sehen, dat Thermometer wiest us twee bet een Graad op de Eilannen un null bet minus söven Graad in´t Binnenland. Dingsdag lacht wedder överall de Sünn un dat blifft dröög bi acht bet ölven Graad.

Dat weren de Plattdüütschen Narichten. Tohoopstellt vun Katrin Martens. Op platt torechtmaakt un vörleest vun Martina Brünjes.