Plattdeutsche Nachrichten Plattdüütsche Narichten vun'n 19. September 2023
Standdatum: 19. September 2023.
Plattdüütsche Narichten vun'n 19. September 2023
Informationen zum Audio
- Verfügbar bis: 17. September 2028 Informationen zur Verweildauer
UN-Generaldebatt snackt över Krieg in de Ukraine
Nee York – De ukrainsche Präsident Selenskyj ward vundaag to’n ersten Mal siet dat russische Angriepen op de Ukraine sülfst vör de Vullversammlung vun de Vereenten Natschonen snacken. Ok Bunneskanzler Scholz ward wat seggen, wenn de Generaldebatt losgeiht. He weer all güstern Abend vör de UNO Vullversammlung darbi, as fiert worrn is, dat Dütschland siet 50 Johren bi de Vereenten Natschonen darbi is. Scholz hett dar för dat Tohooparbeiden warvt, obschons dat so vele Striets op de Welt gifft.
Faeser verbeedt Neonazi-Grupp
Berlin – Bunnesbinnenministersche Faeser hett an’n Morrn de Neonazi-Grupp „Hammerskins“ verboden. As WDR un NDR to weten kriegen hebbt, hebbt Polizisten bunneswiet Wahnungen vun 28 Lüüd döörsöökt, de woll dat Leit in dat Nettwark hebbt. De Grupp „Hammerskins“ stellt sik gegen de Ordnung vun de Verfaten, vermellt dat Bunnesbinnenministerium. De Verfatenschutz meent, se wöörn ok Gewalt anwennen.
IG-Metall foddert 4-Daag-Week
Frankfurt – De IG-Metall foddert för de Arbeiters in de Iesen- un Stahlindustrie een Veer-Daag-Week bi vullen Lohnutgliek. Dat hett de Bunnesvörstand vun de Gewarkschupp nu besluten. Ok de Stahlwarker in Bremen wöörn wat darvun hebben. Buterdem schall dat Arbeitsstäen sekern, meent de IG-Metall. Babenop will de Gewarkschupp för de Arbeiters vun dat Iesen- un Stahlflach 8,5 Perzent mehr Löhns. In Bremen geiht dat üm rund 4.000 Arbeiters.
Bremer Freimaakt schall videoöverwacht werrn
Bremen – De Bremer Freimaakt schall in dütt Johr to’n ersten Mal mit Videokameras överwacht weern, dat vermellt de Werser-Kurier. Darto schall een söß Meter hoger Mast mit twee Kameras in de Nöögde vun den Messetunnel twüschen Autoscooter un Wildwaterbahn opstellt weern. De Binnenbehöörd vermellt, dat hett mit Anslääg in de letzte Tied in Dütschland un in’t europäische Utland to daan. De Freimaakt fangt an’n 13. Oktober an.
Perzess na Angriepen op Werder Ultras geiht los
Bremen – Vör dat Bremer Landgericht mööt sik an’n Vörmiddag dree Mannslüüd wegen een Klopperee na een Footballspeel verantwurten. Jem ward vörsmieten, dat se 2017 na een Bunnesliga-Speel in’t Bremer Veertel op Werder-Ultras losgahn sünd. Vördem hebbt de Ultras dat Lokal „Schänke“ in’n Steintor angrepen. Dar binnen seten ok de Anklaagten.
Dat Weer
Un nu een Blick op dat Weer: in Bremen, Bremerhaben, Deefholt un op Wangerooge överall sünd dat opstunns 15 Graad. Vundaag sünd an de Küst mit faken dicken Wulkens af un an Schuers ünnerwegens. In’t Binnenland blifft dat meist dröög, man dat gifft ok vele Wulken, blots af un an wiest sik de Sünn. To’n Abend hen kann vun’t Emsland her wedder mehr Regen opkamen. Dat is dütlich köhler bi 18 bit 20 Graad. Tokamen Nacht kann bi velen Wulken vun’t Emsland un vun Oostfreesland her ok een beten Regen fallen. An de See is dat fakener natt. Dat Thermometer sackt blots een beten op 17 bit 15 Graad. Morrn gifft dat mal Sünn, mal Wulken un meist överall is dat dröög. Darto ward dat wedder warmer bi 20 Graad op de Eilanden bit 24 Graad in’t Binnenland. Dat weern de Narichten op Platt. Katrin Martens hett se tohoopstellt. Op platt trechtmaakt un vörleest hett se Heidi Jürgens.