Plattdeutsche Nachrichten Plattdüütsche Narichten vun'n 10. Juli 2024
Standdatum: 10. Juli 2024.
Plattdüütsche Narichten vun'n 10. Juli 2024
Informationen zum Audio
- Verfügbar bis: 10. Juli 2025 Informationen zur Verweildauer
Nato-Länner dreept sik in Washington
Washington – Güstern Abend hett een Top-Drepen vun de NATO anfungen, dat dree Daag duern schall. Blangen de Böversten vun Staat un Regeern ut de 32 NATO-Littmaten-Staaten is ok de ukrainsche Präsident Selenskyj darbi. Generalsekretär Stoltenberg hett in sien Reed een nee’et Afkamen ankünnigt, mit dat de Verdeffenderen-Industrie mehr Stütt kregen schall.
Hett slumpt: Ariane 6 is op’n Weg in’t All
Kourou – Veer Johr later as se dat eegens plaant harrn, is Europas nee’e Drägerrakeet güstern Abend to’n ersten Mal afhoben un op’n Weg in’t All. De Ariane Söß is um Klock 9 an’n Abend use Tied vun Kourou in Französisch-Guayana afhoben. Darmit hett de europäisch Ruumfohrt wedder een egen Togang to’n Weltruum. Dat Hartstück vun de Rakeet, de Oberstuuf, is in Bremen boot worrn.
Habenarbeider streikt wieter
Bremen – De Gewarkschupp Verdi hett den Streik to’n Wahrschaun in de Seehabens utweit: vundaag sünd ok de Habenarbeider in Bremen, Wilhelmshaben un Emm opropen, de Arbeid liggen to laten. De Arbeiders in Bremerhaben un Hamborg streikt all siet güstern. Mit den groden Warnstreik will de Gewarkschupp bi dat Verhanneln üm de Tarife mehr Drock op de Arbeitgever maken.
Drogenperzess gegen vermoden Smuggler
Bremen – In’t Landgericht hett jüst een Perzess üm Drogensmuggel in’n groden Stil anfungen. Anklaagt is een 27-jöhriger Mann. He schall as Deel vun een Bann vör goot een Johr versöökt hebben, Drogen ut den Bremerhabener Freehaben in’t Land to bringen. Dat güng üm een half Tonn Kokain, seggt de Anklaag.
Spanien is in’t EM-Finale
München – Spanien is in‘t Endspeel vun de Football-Europameisterschupp kamen. De Mannschupp hett an’n Abend gegen Frankriek wunnen. Gegen wen de Spanier an’n Sünndag dat Finale speelt, kummt hüüt Abend rut. Denn dreept in’t tweete Halffinale de Nedderlanne op England.
Dat Weer
Un nu een Blick op dat Weer: op Wangerooge 18, in Bremen, Bremerhaben un Deefholt sünd dat opstunns 19 Graad. De Schuers treckt vundaag över de Elv af un darachter kummt een dröger Sünn-Wulken-Mix op. An’n Namiddag denn wedder mehr Wulken un blots verenkelt Schuers. Mag ween, ok mit Blitz un Donner, bi 22 bit 27 Graad. Tokamen Nacht treckt de Schuers denn af un darachter wiest sik de Heben to’n Deel klaar un de Sterns funkelt. Dat Thermometer sackt op 17 bit 14 Graad. Morrn fangt de Dag fründlich an, mit Sünn un blots wenigen Wulken. Later treckt dat aver mehr un mehr to, man blots an de Küst kann dat ok mal schuern. De Sünn kann aver ok rutkieken, bi 20 bit 25 Graad. Dat weern de Narichten op Platt. Justus Wilke hett se tohoopstellt. Op platt trechtmaakt un vörleest hett se Heidi Jürgens.