Plattdeutsche Nachrichten Plattdüütsche Narichten vun'n 30. Oktober 2024

VW un IG-Metall dreept sik to tweeter Tarifrunn

Wolfsborg – VW un de Gewarkschupp IG-Metall dreept sik to ehr tweete Tarifrunn. All in de erste Runn vun’t Verhanneln in’n September harr de Kunzern dat Foddern vun de Gewarkschupp na söben Perzent mehr Geld trüchwiesen. VW hett hüüt morrn de Tallen för dat drütte Quartal vörleggt – darna is de Gewinn vun’t Ünnernehmen üm 64 Perzent inbroken.

Streiks to’n Wahrschaun in de Metall-un Elektroindustrie ok in Bremen

Bremen – In de Metall- un Elektroindustrie hett de Gewarkschupp IG-Metall to wieteren Streiks to’n Wahrschaun opropen. Dat gellt ok för dat Bremer Mercedes Wark un Airbus. De drütte Runn to’n Verhanneln weer güstern ahn Ergevnis to Enn gahn. De IG-Metall foddert ünner annern söben Perzent mehr Geld.

EU nimmt Töll babenop op Elektroautos ut China

Brüssel – Siet Middernacht gellt in de EU Töll babenop för Elektroautos ut China. To’n Anfang vun’n Maand harrn de mehrsten vun de Littmatenstaaten för socke Töll babenop stimmt. Dütschland harr sik dagegen utsproken, wiel dat bang weer vör een nee’en groden Hannelsstriet mit China. De EU-Kommischoon begrünnt de Töll darmit, dat China sien Autoboer nich gerecht mit Geld ünner de Arms griept.

Bunnesagentur leggt Arbeitsmarkttallen för Oktober vör

Bremen – De Tall vun de Lüüd ahn Arbeit is in’n Oktober meist gliek bleven. Een „Beter Warrn“ as sünst in’n Harvst gifft dat nich. De swacke Wertschupp drückt wieter op de Stimmung an’n Arbeitsmarkt. Dat hett de Bunnesagentur för Arbeit vermellt. In Bremen harrn knapp 41.500 Minschen keen Job – dat weern 79 weniger in’n Vergliek to’n September. De Quoot blifft darmit bi 11,1 Perzent. In Neddersassen is de Tall vun de Lüüd ahn Arbeit üm 233 op rund 261.400 na baben kladdert. De Quoot liggt hier wieter bi 5,8 Perzent.

Werder Bremen dreept in’n Pokal op Paderborn

Paderborn – Werder Bremen dreept an‘n Abend in de tweete Runn vun’n DFB-Pokal buten op den Tweetligisten Paderborn. De Bremer hebbt noch een Reknung open – vör teemlich genau twee Johren weer Werder in de tweete Runn gegen Paderborn in’t Olbenmeterscheten rutflogen. Bi Borussia Dortmund is dat güstern Abend all scheefgahn. De BVB hett mit 0 to 1 na Verlängerung gegen Wolfsborg verloorn. Ok St. Pauli is rut – na een 2 to 4 gegen Leipzig.

Dat Weer

Un nu een Blick op dat Weer: in Bremen, Bremerhaben, Deefholt un op Wangerooge överall sünd dat opstunns 13 Graad. Hüüt hollt sik för een länger Tied Nevel or dicke Wulken. Later an’n Dag lockert dat to’n Deel kort op, man bold kummt vun de Nordsee nee’e Wulken op. Af un an fallt een paar Druppen or dat sleiht natt daal. De Sünn hett dat swar vundaag. To’n Abend hen lockert dat denn een beten op bi 14 bit 16 Graad. Tokamen Nacht is de Heben erst locker wulkig, ehr dat wedder totreckt. Dat drüppelt blots af un an mal. Dat Thermometer sackt op de Eilanden op 12, in’t Binnenland op 9 bit 7 Graad. Morrn hollt sik de dicken Wulken, verenkelt riet de Heben ok mal op. Meist regent dat nich – bi 13 bit 15 Graad. Dat weern de Narichten op Platt. Irene Lottes hett se tohoopstellt. Op platt trechtmaakt un vörleest hett se Heidi Jürgens.